استنبول دنیا کے خوبصورت ترین شہروں میں سے ایک ہے، لیکن ایک نئے آنے والے کے لیے یہاں کا پہلا ہفتہ کافی الجھنوں بھرا ہو سکتا ہے۔ اگر آپ بھی یہاں نئے ہیں، تو یہ باتیں آپ کی زندگی بہت آسان بنا دیں گی:
1۔ ترکیہ میں باقاعدہ ایک مخصوص فورس ہے جسے "Turizm Polisi" کہا جاتا ہے۔ یہاں یہ بات یاد رکھنا بہت ضروری ہے کہ ترکیہ میں اب تمام پرانے ہنگامی نمبرز (جیسے پولیس کے لیے 155) بند ہو چکے ہیں اور اب تمام ایمرجنسی سروسز کے لیے صرف ایک ہی یونیورسل نمبر 112 استعمال ہوتا ہے۔ جب آپ 112 پر کال کریں تو آپ ٹورازم پولیس سے رابطہ کرنے کا کہہ سکتے ہیں۔ یہ فورس خاص طور پر غیر ملکیوں کے مسائل کو ڈیل کرتی ہے۔ یہاں مقیم غیر ملکیوں کے آدھے سے زیادہ مسائل ٹورازم پولیس کے آتے ہی منٹوں میں حل ہو جاتے ہیں۔
2۔ ہمیشہ BiTaksi یا Uber استعمال کریں، عام ٹیکسی سے بچیں!
خاص طور پر صبیحہ گوکچن (Sabiha Gökçen) یا استنبول ایئرپورٹ پر کبھی بھی کسی ایسی ٹیکسی میں نہ بیٹھیں جس کا میٹر نہ چل رہا ہو۔ اگر کوئی ڈرائیور کہے کہ "میٹر خراب ہے" یا "1500 لیرا فکس کر لو،" تو فوراً وہاں سے ہٹ جائیں۔
ایسا اس لیے ہے کیونکہ وہ بعد میں ہائی وے کے ٹیکس علیحدہ سے مانگیں گے اور غلط رقم بتائیں گے۔ اگر آپ جلدی میں ہوں گے، تو وہ آپ سے کہیں گے کہ '1500 لیرا والا راستہ تو نارمل ہے اور وہاں سے پہنچنے میں 2 گھنٹے لگیں گے، لیکن اگر آپ کو جلدی جانا ہے تو آپ کو مزید اتنے پیسے دینے ہوں گے۔' سب سے بڑی بات یہ ہے کہ یہ تمام باتیں ٹیکسی والے آپ سے اس وقت کریں گے جب آپ قیمت طے کر کے ساتھ بیٹھ چکے ہوں گے اور کافی راستہ گزر چکا ہو گا۔ اس لیے استنبول پہنچتے ہی سب سے پہلے اپنے فون میں BiTaksi ڈاؤن لوڈ کریں۔ یہ اوبر کی طرح کام کرتی ہے، کرایہ پہلے سے طے ہوتا ہے اور آپ کے پاس پورا ریکارڈ رہتا ہے۔
3۔ چابی اور دستخط شدہ معاہدے سے پہلے کرایے کا ڈپازٹ کبھی نہ دیں!
"اپارٹمنٹ روکنے کے لیے ایک مہینے کا ڈپازٹ بھیج دیں" — یہ استنبول کا سب سے بڑا فراڈ ہے۔ یہاں کے اصل اور پیشہ ور مکان مالکان ایک اصول پر چلتے ہیں: پہلے گھر دیکھنا ➔ پھر معاہدے پر دستخط ➔ اور اسی دن آمنے سامنے چابی اور ڈپازٹ کا لین دین۔ اگر کوئی پہلے پیسے مانگے، تو سمجھ جائیں کہ وہ یا تو دھوکہ باز ہے یا آپ کی ناتجربہ کاری کا فائدہ اٹھا رہا ہے۔
4۔ پہلے ہی دن "Istanbulkart" لیں اور پبلک ٹرانسپورٹ استعمال کریں!
اگر آپ ایئرپورٹ سے نکل کر ٹیکسیوں کے چکر اور ٹریفک جام سے بچنا چاہتے ہیں، تو فوری طور پر Istanbulkart (استنبول کارڈ) خریدیں۔ یہ کارڈ میٹرو، بس، ٹرام اور سب سے بڑھ کر فیری (Ferry/Vapur) پر چلتا ہے۔ استنبول کی ٹریفک سے بچنے کا بہترین حل میٹرو اور سمندری فیری ہے، جو نہ صرف سستی ہے بلکہ آپ کو شہر کے خوبصورت نظارے بھی کرواتی ہے۔
5۔ ہسپتالوں میں "Yabancı Hasta Masası" کا پوچھیں!
ترکیہ کے بڑے ہسپتالوں (جیسے Acıbadem، American Hospital، یا Memorial) میں غیر ملکی مریضوں کے لیے ایک الگ ڈیسک ہوتا ہے جسے "Yabancı Hasta Masası" (Foreign Patient Desk) کہتے ہیں۔ یہاں انگریزی بولنے والا عملہ ہوتا ہے.
6۔ نامعلوم دکانوں سے عارضی یا پرانی "سیم کارڈ" (SIM Card) نہ خریدیں!
ایئرپورٹ پر موجود کاؤنٹرز سے فوری سیم کارڈ خریدنے سے گریز کریں کیونکہ وہاں قیمتیں دوگنی ہوتی ہیں۔ شہر میں آکر Turkcell، Vodafone یا Türk Telekom کے آفیشل اسٹورز سے "Tourist Welcome Pack" لیں۔ یاد رکھیں کہ ایک غیر ملکی پاسپورٹ پر لی گئی سیم کارڈ 90 دنوں کے بعد بلاک ہو جاتی ہے جب تک کہ آپ اپنا ریزیڈنس پرمٹ (IKAMET) جمع نہ کروائیں۔
7۔ ہر محلے کی "پبلک مارکیٹ" (Semt Pazarı) تلاش کریں! اگر آپ تازہ پھل، سبزیاں اور پنیر سستے داموں خریدنا چاہتے ہیں، تو معلوم کریں کہ آپ کے علاقے میں "Semt Pazarı" (ہفتہ وار بازار) کس دن لگتا ہے۔ ہر محلے میں ہفتے کا ایک دن مقرر ہوتا ہے جہاں مقامی کسان اپنی تازہ ترین مصنوعات سپر مارکیٹس کے مقابلے آدھی قیمت پر بیچتے ہیں۔ یہ ترک ثقافت کا ایک خوبصورت حصہ بھی ہے۔
8۔ "ایکسپیٹ سپر مارکیٹس" کے چکر چھوڑیں، لوکل دکانوں سے شاپنگ کریں!
شیشلی (Şişli) یا جہانگیر (Cihangir) میں امپورٹڈ اشیاء بیچنے والے بوتیک سٹورز عام ترک دکانوں کے مقابلے میں 40 سے 60 فیصد زیادہ قیمت وصول کرتے ہیں۔ آپ کی ضرورت کا 90 فیصد سامان Migros، A101، BİM اور Şok جیسی عام مارکیٹوں سے انتہائی مناسب قیمت پر مل جائے گا۔ جہاں لوکل لوگ شاپنگ کرتے ہیں، وہیں سے آپ بھی کریں۔
Comments
Post a Comment